म्हसवड दि. १४
संत श्रेष्ठ नामदेव महाराज यांच्या स्मारक स्थळाची पाहणी संत नामदेव महाराज यांच्या वंशजाकडुन व समाजबांधवांकडुन पंढरपुर येथे जावुन करण्यात आली, यावेळी या समाज बांधवाकडुन स्थळ पाहणी करताना आनंद व्यक्त करण्यात येवुन शासनाचे आभार मानण्यात आले.
संतश्रेष्ठ नामदेव महाराजांचे भव्य स्मारक पंढरपुर या तीर्थ क्षेत्र ठिकाणी याठिकाणी व्हावे यासाठी समस्त शिंपी समाज व संत श्रेष्ठ नामदेव महाराज यांच्या वंशजाकडुन शासनाकडे करण्यात आली होती, समाजाची ही मागणी नासप चे जिल्हाध्यक्ष इंजि. सुनील पोरे यांनी लावुन धरत यासाठी राज्याचे ग्राम विकास मंत्री जयकुमार गोरे यांना साकडे घातले होते त्यांच्या या मागणीला शासनाकडुन हिरवा कंदील दाखवण्यात येवुन त्यासाठी प्रत्यक्षात निधीही मंजुर करण्यात आल्याने समस्त शिंपी समाजामध्ये आनंदाचे वातावरण आहे.
पंढरपूर येथे श्री संत शिरोमणी नामदेव महाराज यांच्या भव्य स्मारकासाठी शासनाने मंजूर केलेल्या जागेची गुरुवार, दिनांक 12 फेब्रुवारी 2026 रोजी स्थळ पाहणी करण्यासाठी अनेक समाजबांधवांनी स्मारकस्थळी हजेरी लावली होती.
या स्थळ पाहणीपूर्वी श्री. केशवराज संस्था, नामदेव मंदिर, पंढरपूर येथे सकाळी बैठक आयोजित करण्यात आली होती, ज्यामध्ये नामदेव महाराज यांच्या वंशजासह समाजबांधव, पदाधिकारी व मान्यवर उपस्थित होते.
त्यानंतर भक्ती सागर परिसरात, चंद्रभागा नदीच्या पलीकडे असलेल्या सुमारे 65 एकर क्षेत्रालगत स्मारकासाठी प्रस्तावित जागेची अधिकृत पाहणी करण्यात आली.
या पाहणीसाठी उपविभागीय अधिकारी पंढरपूर, सार्वजनिक बांधकाम विभागाचे कार्यकारी अभियंता, नगरपरिषदेचे मुख्याधिकारी तसेच प्रकल्प सल्लागार उपस्थित होते.
श्री संत नामदेव महाराज यांच्या स्मारक उभारणीसाठी आराखडा व नियोजन प्रक्रिया वेग घेणार असून, ही पाहणी समाजासाठी ऐतिहासिक व अभिमानास्पद क्षण ठरली.
या वेळी नामदेव महाराज वंशज,नामदेव समाजोन्नती परिषद,श्री संत नामदेव क्षत्रिय एकसंघ,श्री केशवराज संस्था पंढरपूर व श्री संत नामदेव शिंपी समाज पंढरपूर यांच्या पदाधिकाऱ्यांसह महाराष्ट्रातुन मोठ्या संख्येने समाजबांधव उपस्थित होते.
स्थळ पाहणीनंतर सर्व उपस्थितांसाठी नामदेव मंदिर येथे भोजन व्यवस्था करण्यात आली.
श्री संत नामदेव महाराज स्मारक उभारणीसाठी सुरू झालेली ही प्रक्रिया समाजाच्या ऐक्याचे व श्रद्धेचे प्रतीक ठरत आहे, असे मत उपस्थित मान्यवरांनी व्यक्त केले.०००
About the Author
