नगराध्यक्ष पदासाठी आता पाच महिला रिंगणात अर्ज माघारी नंतरच होणार चित्र स्पष्ट

म्हसवड दि. १८ ( महेश कांबळे )
म्हसवड पालिका निवडणुकीत उमेदवारांचे अर्ज भरण्याच्या शेवटच्या दिवशी अनेक इच्छुकांनी आपले उमेदवारी अर्ज पालिकेत दाखल केल्याने इच्छुकानी शंभरी पार केली होती, मात्र अर्ज छानणीत किती जणांचे अर्ज होणार यावर पुढील चित्र स्पष्ट होणार असुन थेट नगराध्यक्ष पदाच्या लढतीत आता पाच महिला निवडणुकीच्या रिंगणात राहिल्या आहेत, तर ४ महिलांचे अर्ज अवैध ठरले आहेत.
म्हसवड पालिकेची पंचवार्षीक निवडणुक २ डिसेंबर रोजी संपन्न होत असुन या निवडणुकीची प्रक्रिया पालिका सभागृहात सध्या सुरु आहे, पालिका निवडणुकीसाठी १७ नोव्हेंबर ही उमेदवारी अर्ज भरण्याची शेवटची तारीख होती या दिवशीच अनेक इच्छुकांनी आपले उमेदवारी अर्ज दाखल केल्याने हा आकडा शंभरी पार गेला, तर नगराध्यक्ष पदासाठी ही अनेक महिला इच्छुक असल्याने ही संख्या ही दोन आकड्यात गेली होती.
दरम्यान आज दि.१८ रोजी उमेदवारांनी दाखल केलेल्या उमेदवारी अर्जाची छानणी पालिका सभागृहात निवडणुक निर्णय अधिकारी मीना बाबर, व सह. निवडणुक अधिकारी डॉ. सचिन माने यांच्या उपस्थितीत इच्छुकांच्या समोर घेण्यात आली यामध्ये नगराध्यक्ष पदासाठी दाखल केलेल्या ९ उमेदवारांच्या १२ अर्जाची छानणी करण्यात आली यामध्ये सुवर्णा सुनील पोरे, प्राजकता शुभम पोरे, जयमाला विशाल विरकर, कांता शंकर विरकर या भाजपच्या महिला उमेदवारांचे अर्ज पक्षाचे अधिकृत जोडपत्र नसल्याने ते अवैध ठरवण्यात आले. तर पुजा सचिन विरकर भाजप, भुवनेश्वरी तेजसिंह राजेमाने राष्ट्रवादी कॉंग्रेस पार्टी, रुपाली वाल्मिक सरतापे बहुजन समाज पक्ष, तर गौरी विशाल माने व श्रीमती हिंदमालादेवी राजेमाने या दोन अपक्ष महिलांसह एकुण ५ महिलांचे अर्ज वैध ठरले आहेत.
उमेदवारी अर्ज छानणीनंतर उमेदवारी मागे घेण्याची अंतिम तारीख ही २१ नोव्हेंबर ही असुन या नंतरच नगराध्यक्ष पदाच्या लढतीचे खरे चित्र स्पष्ट होणार आहे.
पालिका सभागृहात उमेदवारांचे अर्ज छानणी ही अतिशय संथ गतीने परंतु काटेकोरपणे सुरु असल्याने एका प्रभागाची छानणी करण्यासाठी किमान १ तास लागत आहे यामुळे छानणी प्रक्रियेला विलंब लागत असल्याचे प्रशासनाकडुन सांगण्यात आले.०००